යුග ගීයක් ගයන්න ලංකාවේ ගායකයෙක් හොයන ඕස්ට්‍රේලියානු ගායිකාව – ටමාරා

freemedia.lk වෙබ් අඩවිය , ඕස්ට්‍රේලියානු ජාතික , සුප්‍රසිද්ධ ගායිකා ටමාරා සෙන්ට් ජෝන් (TAMARA ST JHON) , සමග කල විශේෂ  සම්මුඛ සකච්ජාවකි

ප්‍රශ්ණය –   ඕස්ට්‍රේලියාවේ ඉපදුනු හැදී වැඩුණු , ඕස්ට්‍රේලියානු ජාතිකයකු වුවත් ඔබ නිතරම වගේ ශ්‍රී ලංකාවේ සංචාරය කරනවා , වැඩිය ප්‍රසිද්ධ නොකලට ඔබ මේ රටේ  මහා පරිමානයේ  සමාජ සේවා  වැඩසටහන් රැසකටම දායක වෙලා ඉන්නවා . මොකක්ද මේ තරම් ලංකාව එක්ක තියෙන සම්භන්ධය ?

උත්තරය – ලංකාවට මම ගොඩාක් ආදරෙයි , ඒක තමයි රහස (සිනාසෙමින් ) . මගේ සීයා එංගලන්ත ජාතිකයකු වුනාට මගේ තාත්තා ලංකාවේ ඉපදුනු කෙනෙක් , තාත්ත  ඉපදුනේ ගාල්ලේ , පොඩි කාලේ හැදී  වැදුනේ පානදුරේ . මගේ අම්ම මලයාසියානු ජාතික කාන්තාවක් වුනත් ඇගේ මව , ඒ කියන්නේ මගේ ආච්චිඅම්මා ඉපදිලා තියෙන්නෙත් ලංකාවේ ,  . ඒ නිසා ලංකාවත් එක්ක මගේ පුදුමාකාර බැඳීමක් තියෙනවා .

මගේ අම්මයි තාත්තයි පස්සේ කාලෙක තමයි ඕස්ට්‍රේලියාවේ පදිංචියට ගිහින් තියෙන්නේ . ඒ නිසා මම ඉපදුනේ ඕස්ට්‍රේලියාවේ . ඒත් අදටත් මම ලංකාව සලකන්නේ මගේ දෙවෙනි ගෙදර විදියටයි. දෙවෙනි මව් රට විදියටයි.

 

ප්‍රශ්ණය – ඔබ අද ජාත්‍යන්තර මට්ටමේ ගායිකාවක් . ඕස්ට්‍රේලියාවේ පමණක් නොවෙයි , මලයාසියාව , ශ්‍රී ලංකාව වගේ රටවල්වලත්  ඔබට රසික රසිකාවියන් ඉන්නවා . සංගීත ක්ෂේත්‍රය ඔස්සේ ඔබ ආ මේ ගමන ගැන කෙටියෙන් පැහැදිලි කලොත් ?

උත්තරය – සංගීතයට යොමුවීමට මට ප්‍රධාන ලෙසම බලපෑවේ මගේ තාත්තා . එයා දක්ෂ ගායකයෙක් , ඒ ගායන හැකියාව තමයි මට උරුම වෙලා තියෙන්නේ . මම අවුරුදු 4 ඉඳලම  ගීත  ගයන්න පටන් ගත්තා . පියානෝවටත් මම කුඩා කාලේ ඉඳලම ආදරය කළා .  සංගීත ක්ෂේත්‍රයෙන් ඉහලට එන්න මට තාත්තාගෙන් , අම්මගෙන් ලොකු උදව්වක් ලැබුනා . ඒ දෙන්නගේ කැපවීම හා දිරිගැන්වීම තමයි මගේ සාර්ථකත්වය පිටිපස්සේ තියෙන්නේ .

, මට මතකයි. මම අවුරුදු 15 වෙනකොට ගීත ලියන්නත් , තනු නිර්මාණය කරන්නත් පටන් ගත්තා. ඉන් පස්සේ මම විවිධ සංගීත තරඟ වලට ඉදිරිපත් වුනා , විවිධ උත්සව අවස්ථා වල ගී ගැයුවා . හෝටල් වල ගී ගැයුවා. සංගීත කණ්ඩායම් වලට එක්වුණා , වසර ගණනාවක් බොහොම වෙහෙස මහන්සි වෙලා , වැඩකලා . පියවරෙන් පියවර තමයි මම ඉදිරියට ආවේ .

 

ප්‍රශ්නය – ඔබ ගීත නිර්මාණය කරන්නේ ඉංග්‍රීසි බසින් වුවත් , බටහිර සංගීත රටාවන් අනුගමනය කලත් එම ගීත තුල ආසියානු රිද්මයද යම් පමණකට ගැබ්ව තිබෙන බවක් හැඟෙනවා .

පිළිතුර – ඔබ මගේ ගීත හොඳින් අසා තිබෙන හැඩයි ( සිනාසෙමින් ) , ඔව් , මගේ ගීත වල ආසියානු රිද්මයද මුසුව තිබෙනවා . ඊට හේතුව ආසියානු සංස්කෘතියද මට බොහෝ සමීප වීමයි . ඒවගේම මම බොහොමයක් නිර්මාණ සිදුකරන්නේ මගේ ආසියානු රසිකයින් ඉලක්ක කරගෙනයි . එසේම රමගේ සික රසිකාවියන්ගෙන් වැඩිදෙනෙක්ද  ආසියානුවෝ.

විශේෂයෙන්ම මම මලයාසියාවේ සංගීත ක්‍ෂේත්‍රයට ඍජුවම සම්භන්ධවී සිටිනවා එරට සංගීත කණ්ඩායම් කිහිපයක් සමගම ගී නිර්මාණ කර තිබෙනවා . එසේම එරට සුප්‍රසිද්ධ සංගීතවේදීන් සමග එක්වද  ගීත නිර්මාණය කර තිබෙනවා . එරට ප්‍රධානතම ගුවන් විදුලි හා රූපවාහිනී නාලිකා සියල්ලකම පහේ මගේ ගීත ප්‍රචාරය වනවා . ගීත දර්ශක වලත් මගේ ගීත ඇතුලත් වෙනවා.

 

ප්‍රශ්නය – ඔබගේ ඥාතීන් තවමත් ශ්‍රී ලංකාවේ සිටිනවද ? ඔවුන් හා ඔබ අතර සබඳතාවය කොයි වගේද ?

පිළිතුර -මගේ ඥාතීන් හුඟදෙනෙක් ;ලංකාවේ ඉන්නවා . ඒ අය මට බොහොම සමීපයි . හැකි හැමවිටම මම ඔවුන්  බලන්න එනවා. හැකි සෑම උදව්වක් උපකාරයක්ම කරනවා , ඒ අය මට මගේම සහෝදර සහෝදරියන් වගේ දැනෙනවා.

අපි ඕස්ට්‍රේලියාවේ හිටියත් අපිට ලංකාව අමතක නැහැ . අපේ ගෙදර තවමත් ලංකාවේ කෑම හැදෙනවා . ආප්ප එක්ක කට්ට සම්බෝල අපේ ගෙදර අයගේ ආසම  කෑමක් . අපි ගෙදරදී බයිලා තාලයට ගී කියනවා . අපේ තාත්ත බයිලා රිද්මයට හරිම කැමතියි . උත්සව අවස්ථාවලට අපි සාරි පවා අඳිනවා .

 

ප්‍රශ්ණය -ඔබට ලංකාව තුලත් රසික රසිකාවියන් රාශියක් ඉන්න නිසා , මෙරට සංගීත කණ්ඩායමක් හෝ ගායකයෙක් සමග එක්වෙලා ගීයක් නිර්මාණය කරන්න අදහසක් නැද්ද ?

පිළිතුර – එවැනි ගීයක් නිර්මාණය කරන්න ලොකු බලාපොරොත්තුවක් හිතේ තියෙනවා . ලංකාවේ ඉතාමත් දක්ෂ සංගීත ශිල්පීන් ගායකයින් ඉන්නවා . ඔවුන් සමග එක්ව නවතම ආකාරයේ ගීතයක් නිර්මාණය කිරීමට මා බලාපොරොත්තුවෙනවා .

මගේ  සිංහල දෙමළ  භාෂා දැනුම දුර්වල  නිසා මම හිතාගෙන ඉන්නේ ලංකාවේ සංගීත කණ්ඩායමක් හෝ ගායකයෙක් එක්ක එකතුවෙලා සිංහල හා ඉංග්‍රීසි භාෂා දෙකම ඇතුලත් ගීතයක් නිර්මාණය කරන්නයි . ඇත්තටම මම මේ දවාස් වල එවැනි  අලුත්ම විදියේ  යුග ගීතයක් ගයන්න ලාංකික ගායකයෙකු සොයමිනුයි ඉන්නේ .

 

ප්‍රශ්ණය – ඔබගේ සංගීත ගමනේ ඉදිරි පියවරයන් ගැන තවදුරටත් කෙටියෙන් විස්තර කලොත් ,

පිළිතුර – තවත් මැලේසියානු ගායකයකු සමග එක්වී “වී හැව් ඉට් “ නවාතම ගීයක් එලි දක්වන්නට කටයුතු යොදා තියෙනවා . ඒ මියුසික් වීඩියෝවේ රඟපාන්නෙත් ලංකාවේ නිරූපන ශිල්පියෙක් . ඒ ගීතය ලංකාවෙත්  අතිශයෙන් ජනප්‍රිය වනු ඇතැයි අනුමාන කරනවා.

ඒවගේම මෙවර ශ්‍රී ලංකා සංචාරයේදී මගේ රසික රසිකාවියන්ගෙන් ලැබුණු ප්‍රතිචාර හා යෝජනා ද සැලකිල්ලට අරගෙන , ඔවුන්ට තවදුරටත් සමීපවන ආකාරයේ ගීත කිහිපක්ම ඉදිරියේදී එලි දක්නට මම බලාපොරොත්තු වෙනවා .

 

ප්‍රශ්නය සමාජ සේවිකාවක් ලෙසත් ඔබ නිහඬවම මෙරට තුල සුවිශාල වැඩකොටසක් ඉටු කරනවා.  ඒ සඳහා මාධ්‍ය ප්‍රචාරයක් ලබාගන්න ඔබ අකමැති වුනත් , ඒ ගැන සුළුවෙන් හෝ දැනගන්න ඔබගේ මෙරට රසික රසිකාවියන් කැමති ඇති නේද ?

ටමාරා , freemedia.lk මාධ්‍යවේදී පැතුම් වික්‍රමරත්න සමග

පිළිතුර – ඇත්තටම මම සමාජ සේවයේ නිරතවෙන්නේ ප්‍රසිද්ධිය අපේක්ෂාවෙන් නෙවෙයි . ඒ නිසයි ඒ ගැන මාධ්‍ය හරහා ප්‍රචාරය කරන්න මම කැමති නැත්තේ. නමුත් මේ රටට මම ආදරෙයි. මේ රටේ මිනිස්සු හරිම සංග්‍රහශීලී . අහිංසකයි , කරුණාවන්තයි. ඒ නිසා මේ ජනතාවගේ දුකකදී මට හැකි උපරිමයෙන් සහය දීමට මම ඉදිරිපත්වෙනවා . මගේ සංගීත නිර්මාණ හරහා ලැබෙන මුදල් වලින් තමයි මම මේ සමාජ සේවා වැඩ කරන්නේ . මගේ දෙමව්පියනුත් මට ඒ සඳහා උදව් කරනවා . සමාජ සේවය හරහා මම විශාල ස්වයං තෘප්තියක් ලබනවා .

Leave a Reply

This site uses Akismet to reduce spam. Learn how your comment data is processed.