ජගත් නියෝජිතවරු දෙන උපදෙස් ක්‍රියාත්මක කරන්න රජය බැදී නැහැ.

ජගත් විශේෂ නියෝජිතවරුන් දෙන උපදෙස් හෝ නිර්දේශ ක්‍රියාත්මක කිරිමට රජයන් බැඳී නොමැති බව, ශ්‍රී ලංකා විදේශ කටයුතු අමාත්‍යාංශය අවධාරණය කර සිටී.
 සත්‍යය, යුක්තිය, හානිපූර්ණය සහ ගැටුම් නැවත ඇති නොවීම පිණිස වන සහතිකවීම් ප්‍රවර්ධනය කිරීම පිළිබඳ එක්සත් ජාතීන්ගේ විශේෂ නියෝජිත පැබ්ලෝ ඩි ග්‍රෙයිෆ් මහතාගේ ශ්‍රී ලංකා සංචාරය සම්හන්ධයෙන් නිවේදනයක් නිකුත් කරමින් විදේශ අමාත්යංශය ඊයේ (11) දින  මේ බව සඳහන් කර ඇත.
 ඩි ග්‍රෙයිෆ් මහතා  මෙම ශ්‍රී ලංකා සංචාරයෙන් පසු ලබන සැප්තැම්බරයේ ,ජගත් මානව හිමිකම් කවුන්සිලය වෙත වාර්තාවක් ඉදිරිපත් කරනු ඇති නමුත් එහි   නිර්දේශ අතර ශ්‍රී ලංකාවේ ජනතාවට වාසිදායකයැයි රජය සලකන නිර්දේශ තිබේ දැයි තීරණය කිරීමද, ඔහුගේ දැනුමෙන්, විශේෂඥභාවයෙන් හා උපදෙස්වලින් ප්‍රයෝජන ලබමින් තව දුරටත් යම් ආකාරයකින් ඔහුගේ උපදෙස් පතන්නේද යන්න තීරණය කිරීමද ශ්‍රී ලංකා රජයට අයත් කාර්යක් වනබව මෙම නිවේදනයේ දැක්වේ.
මෙතෙක් ශ්‍රී ලංකාවේ බලයට පත්වූ රජයන් රැසක්ම විශේෂිත තේමාත්මක කරුණු සම්බන්ධයෙන් මේවැනි විශේෂ නියෝජිතයන්ගේ අදහස් සහ විශේෂඥ උපදෙස් ලබාගැනීම සඳහා ඔවුන්ට මෙරටට පැමිණීමට ආරාධනා කොට ඇති බවත් . සම්පත් දායකයන් ලෙස පමණක් කටයුතු කරන ඔවුන්ගේ විශේෂඥ දැනුමෙන් සහ අත්දැකීම්වලින් ප්‍රයෝජන ලැබීමට රජයන්ට හැකියාව ඇති බවත් මෙම නිවේදනයේ සඳහන් වේ..
ආයතනවල ශක්‍යතා වර්ධනය, ප්‍රතිපත්ති සකස්කිරීම, ප්‍රතිපත්ති ප්‍රතිසංස්කරණය සහ පුහුණු අවශ්‍යතා ආදිය විෂයෙහි වාසිදායක වන ආකාරයෙන්, රජයකට අවශ්‍යයැයි හැඟෙන පරිද්දෙන්  ඔවුන්ගේ උපදෙස් සහ විශේෂඥභාවය ලබා ගැනීමට රටවල්වලට හැකි බවද විදේශ අමාත්යංශය නිකුත් කල නිවේදනයේ දැක්වේ.
 සත්‍යය, යුක්තිය, හානිපූර්ණය සහ ගැටුම් නැවත ඇති නොවීම පිණිස වන සහතිකවීම් ප්‍රවර්ධනය කිරීම පිළිබඳ එක්සත් ජාතීන්ගේ විශේෂ නියෝජිත පැබ්ලෝ ඩි ග්‍රෙයිෆ් මහතා ශ්‍රී ලංකා රජයේ ආරාධනාව මත 2017 ඔක්තෝබර් මස 10 සිට 23 දින දක්වා මෙරට නිල සංචාරයක නිරත වෙයි.
මෙම නිල සංචාරය අතරතුර එක්සත් ජාතීන්ගේ විශේෂ නියෝජිතවරයා, අමාත්‍යවරුන්, පාර්ලිමේන්තු මන්ත්‍රීවරුන්, මධ්‍යම රජයේ සහ පළාත් මට්ටමේ රාජ්‍ය නිලධාරීන්, සිවිල් සමාජයේ සාමාජිකයන්, ආගමික නායකයන්, විද්වතුන් සහ ශ්‍රී ලංකාවේ සිටින ජාත්‍යන්තර ප්‍රජාවේ නියෝජිතයන් හමුවීමට නියමිතය.
ඔහු ත්‍රිකුණාමලය, මන්නාරම, අනුරාධපුරය, යාපනය, කිලිනොච්චිය, වවුනියාව, මහනුවර සහ මාතර යන ප්‍රදේශවලද සංචාරය කරනු ඇත.
යාපනයේදී සහ කොළඹදී ප්‍රසිද්ධ දේශන දෙකක් පැවැත්වීමට නියමිත විශේෂ නියෝජිතවරයා, නිල සංචාර අවසානයේදී සියලු විශේෂ නියෝජිතවරුන් කරන ආකාරයට ඔක්තෝබර් 23 වැනි දින සිය සංචාරය නිමා කරමින් මාධ්‍ය හමුවේ අදහස් දැක්වීමටද නියමිතය.
එක්සත් ජාතීන්ගේ විශේෂ නියෝජිතවරුන්ට නියම වී ඇති පරිදි ඔහු සිය නිල සංචාරය පිළිබඳ වාර්තාවක් 2018 සැප්තැම්බර් මාසයේදී එක්සත් ජාතීන්ගේ මානව හිමිකම් කවුන්සිලයට ඉදිරිපත් කරනු ඇත.

Leave a Reply

This site uses Akismet to reduce spam. Learn how your comment data is processed.