ඉරණතිවු: “අපේ දූපත අපට දෙන්න”

ඉරණතිව් කරා යළි පැමිණි ජනතාව සිය භූමියේ අයිතිය ඉල්ලා සිටිමින්
Image captionඉරණතිව් කරා යළි පැමිණි ජනතාව සිය භූමියේ අයිතිය ඉල්ලා සිටිමින්

යුද සමයේ ඉරණතිවු දූපතෙන් ඉවත්ව ගිය ධීවර ජනතාව එහි සිය ඉඩම් අයිතිය ඉල්ලා සිටිමින් සිය පාරම්පරික ජනාවාසය කරා යළි ලඟා වූහ.

කිලිනොච්චි දිස්ත්‍රික්කයට අයත් දූපත හැර දමා 1992 වසරේ ඉවත්ව ගිය ජනතාව, දැනට ඔවුන් ජීවත් වෙන ‘ඉරණමාතා’හි සිදු කරන ලද කිතුනු පුද පූජා වලින් අනතුරුව බෝට්ටුවලින් යළි ඉරණතිවු කරා ලඟාවෙමින් එහි පදිංචිය ආරම්භ කළහ.

තම මුතුන්මිත්තන්ගේ පටන් සිය ප්‍රජාව වසර දෙසීයක පමණ කාලයක් එම දූපතේ පාරම්පරිකව වාසය කරන බව එම ධීවරයෝ පවසති.

බෝට්ටුවලින් යළි දූපත කරා ගමන් ගත් ආකාරය
Image captionබෝට්ටුවලින් යළි දූපත කරා ගමන් ගත් ආකාරය

1992 වසරේ දී දූපත අහිමි වූ ජනතාව, යුද්ධය නිමවීමෙන් අනතුරුව, 2009 වසරේ පටන් එහි යළි පදිංචිය සඳහා අවසර ඉල්ලා සිටිමින් සාමකාමී උද්ඝෝෂණ වල නිරතව සිටියහ.

ඒ සඳහා ඔවුන් විසින් 2017 මැයි මාසයේ පළමුවෙනිදා ආරම්භ කළ සත්‍යග්‍රහයකට ලබන මැයි පළමුවෙනිදාට වසරක් සම්පූර්ණ වෙයි.

වසර විසි හයකට පසු යළි දූපතට පැමිණ සිටින කණ්ඩායමක්
Image captionවසර විසි හයකට පසු යළි දූපතට පැමිණ සිටින කණ්ඩායමක්

ධීවර කර්මාන්තයෙන් යැපෙන දමිළ කිතුනුවන් වන ඉරණතිවු පාරම්පරික උරුමකරුවෝ දූපතේ සිය ඉඩම් අයිතිය තහවුරු කෙරෙන ඔප්පු තප්පු තමන් සතු බව කියා සිටිති.

පිහිටීම අනුව වර්ග සැතපුම් හයක් පමණ වන භූමිය ආවරණය කෙරෙන දූපත ‘මහ ඉරණතිවු’ සහ ‘කුඩා ඉරණතිවු’ යනුවෙන් දූපත් දෙකකින් සමන්විත වෙයි.

තවමත් නිරුපද්‍රිත දේවස්ථානය
Image captionතවමත් නිරුපද්‍රිත දේවස්ථානය

එහි ප්‍රධාන දූපතේ පමණක් ඉඩම් අයිතිය සහිත පවුල් 143 ක්ද කුඩා දූපතේ එවැනි පවුල් තිස් පහක් ද ඊට අමතරව මෑතදී එහි පදිංචියට ගිය තවත් පවුල් කීපයක් ද 1992 ට පෙර ජීවත් වූ බව දූපතේ යළි පදිංචියට ගිය ජනතාව පවසති.

දූපත් දෙකේ පදිංචි පවුල් සංඛ්‍යාවේ එකතුව දෙසීය ඉක්මවයි.

තරමක් ගරා වැටුණ පාසලක්, තැපැල් කාර්යාලයක් සහ කතෝලික පල්ලියක් ඇතුළත් එම ප්‍රධාන දූපත අංග සම්පූර්ණ ජනාවාසයක ලක්ෂණ පෙන්නුම් කරයි.

"අපේ දූපත අපට දෙන්න"
Image caption“අපේ දූපත අපට දෙන්න”

1896 වසරේ යටත් විජිත පාලන සමයේ විශේෂ පාෂාණයකින් ඉදි කරන ලද ඓතිහාසික කුළුණක් ද එහි දක්නට ලැබෙයි.

ඉරණතිවු ධීවර ප්‍රජාව එහි ගොස් යළි පදිංචි වීම පිළිබඳ ප්‍රතිචාරය දැන ගැනීම සඳහා ශ්‍රී ලංකා නාවික හමුදාවේ ප්‍රකාශක කොමාන්ඩර් දිනේෂ් බණ්ඩාර දිසානායකගෙන් විමසීමක් කළ විට අදාළ තොරතුරු පිළිබඳව සොයා බලා බීබීසී සිංහල අංශය දැනුවත් කරන බව ඔහු කියා සිටියේය.

පැරණි ගේ දොර සොයා යමින්
Image captionපැරණි ගේ දොර සොයා යමින්

Reporter Author

Leave a Reply

This site uses Akismet to reduce spam. Learn how your comment data is processed.